بقلم: د. سمر أمين الخرباش -

الحقيقة بعد ان شاهدت امس تصريحات الشيخ صادق الاحمر في المؤتمر القبلي اللي اقر فيه تعريف واسس المدنية والوطنية الجامعة والتصدي لعملاء ايران (رغم انه قبل ايام اتكلم عن المبالغ اللي يستلمها من السعودية).. ما علينا المهم ان الشيخ صادق طالب بدولة مدنيه تكفل المساواة للجميع (ماعدا الشيوخ وابنائهم) وتكون خاليه من اي عنف او سلاح (طبعا انتم فاهمين غلط كل الاسلحة اللي كانوا موجودين عبارة عن اكسسسوار وشوية ار بي جي وشوية صواريخ هذه خاصة للاحتفالات لمن يكون الشيوخ في العصيمات يشتوا يرحبوا بحد او يهنوا حد)..

طبعا احنا عارفين ان شوية بانلاقي الحوثي عمل مؤتمر قبلي ثاني ضد عملاء السعودية ويتبنى فيه الدولة المدنية التي يتساوى فيها الجميع (عدا آل البيت اللي هم الاحق باي منصب) و تكون خاليه من اي عنف او سلاح باتقول لا عنده سلاح!!؟؟ (ابسليوووووتلي انتم غلط هي شوية دبابات بسبب وعورة الطريق في صعده يستخدموها للتنقل والصواريخ لمن يشتوا يحتفلوا بحد بسبب بعد المسافة يستخدموها)..

ياليت اللي كتبوا عن الدولة المدنية والمواطنة المتساوية ونزع الاسلحة اتعرفوا على الشيخ صادق وعلى الحوثي كانوا بايتعلموا الكثير واكيد كانت اتغيرت مستوى كتاباتهم عن هذين المفهومين الله يخليهم ذخرا لليمن..

وبناء على ما سبق نقترح احنا مواطنين درجة عاشرة الجهلة المتخلفين اللي ساكنين بباقي الجمهورية عليكم يا اصحاب النسب الرفيع والمكانة العالية انشاء نظام فدرالي تكون فيه - صنعاء وصعده بما يشمل عمران وسنحان وخولان- فدرالية واحده علشان نخلصكم من تخلفنا وجهلنا وعدم فهمنا للمواطنة المتساوية.. الافضل ان نخلصكم من عبئنا لأننا حاسين اننا اتعبناكم كثير وخصوصا اسرة صالح واسرة الاحمر (فأنتم هرمتم وانتم تحافظوا على اراضي ونفط الجنوبيين من الجنوبيين, واراضي ومزارع تهامة من الشيوخ والمتنفذين وحماية تجار المناطق الوسطى من المتنفذين المستغلين و حمايه المستثمرين الاجانب من المبتزين لهم باسم الحماية) ولانا مقدرين تعبكم واللي تخسروه علشان تقوموا لهذه المهام اللي هي حمل عليكم وبدون اي فائدة ترجع لكم..

نقترح انه تبقوا انتم في فدراليتكم تنفعوها طالما اننا شعب جاهل ومتخلف ومش مقدر اللي تعملوه وتسيبونا احنا في باقي اليمن نقتل بعض او ندمر بعض الى ان نتعلم كيف "نعيش معا كأخوة او نموت معا كأغبياء" هذا احنا مش انتم طبعا.. ولأننا ناكرين جميل وما قدرنا دور الفرقة والحرس الجمهوري في حمايتنا طول هذه السنيين رائيي برضة تأخذوهم لينعموا بالسلام في فدراليتكم وتسحبوا جميع الالوية التابعة لهم من كل اليمن اصلا احنا ناس ما نستحقش النعمة اللي بفضلكم وصلنا لها..

ملحوظه: لو شايفيين الدكتور ياسين سعيد نعمان با يعمل لكم مشاكل او با يحاول يغتال ناس منكم هاتوه لعندنا علشان تنعموا بأمن وراحه بال..

والله الموفق والمستعان .. ويا ليت تفهمونا غلط.